கிறிஸ்துவுக்குள் பிரியமானவர்களே,
கர்த்தராகிய இயேசு கிறிஸ்துவின் இனிய நாமத்தில் அன்பின் வாழ்த்துக்கள்.
நம்முடைய தேவன் நமக்கு ஜெயம் தருகிற தேவன். ஒரு கிறிஸ்தவ மனிதனுடைய வாழ்க்கையானது ஜெயமுள்ளது, வெற்றியுள்ளது. மரணத்தை ஜெயமாக விழுங்கிய இயேசு கிறிஸ்துவை தன் வாழ்க்கையில் முன் வைத்து வாழ்கிற ஒவ்வொரு மனிதனுடைய வாழ்க்கையும் வெற்றியுள்ளது. அவர் சிலுவையின் மீது வெற்றி அடைந்தார். அவர் வெற்றி அடைந்தபடியால் நாமும் வெற்றியுள்ளவர்களாய் மாற நம்மை அர்ப்பணிப்போம். இந்த வெற்றியின் வாழ்க்கைக்கு அவர் நம்மை ஆயத்தப்படுத்த விரும்புகிறார். அவர் சில காரியங்களை நமக்காக ஆயத்தப்படுத்துகிறார். அவ்வண்ணமாக நாமும் சில காரியங்களை ஆயத்தப்படுத்த வேண்டும்.
இயேசு மரித்துப்போன லாசருவின் கல்லறையினிடத்திற்குச் சென்றார். அந்தக் கல்லறையில் மூடப்பட்டிருந்த சரீரத்தை அவர் காணவேண்டும், அற்புதத்தைச் செய்ய வேண்டும் என்று விருப்பம் கொண்டார். ஆனால் கல்லை அவர் புரட்டவில்லை. நீங்கள் கல்லைப் புரட்டுங்கள் என்று சொன்னார். நாம் செய்ய வேண்டிய காரியத்தை நாம் செய்யும் போது, நம்மால் செய்ய இயலாத காரியத்தை அவர் நமக்காக செய்கிறவராக இருக்கிறார். அவர் விரும்புகிற காரியம் இதுதான். இந்த ஆயத்தம் வரும்போது மாத்திரம் தான் நாம் வெற்றியைப் பெற்றுக் கொள்ள முடியும்.
வேதத்தில் அநேக நாட்களைக் குறித்து பார்க்கிறோம். தீங்கு நாட்களைக் குறித்து சங். 27:5ல் பார்க்கிறோம். யுத்த நாளைக் குறித்து நீதி. 21:31ல் பார்க்கிறோம்; ஏசாயா 60:20ல் துக்க நாட்கள் என்று பார்க்கிறோம். 1பேதுரு2:9ல் நியாயத்தீர்ப்பின் நாள் என்று பார்க்கிறோம். இப்படியாக பல நாட்கள் வேதத்தில் உண்டு. நம்முடைய வாழ்க்கையில் எப்படி பிறந்தநாள், திருமணநாள், வேலையில் சேர்ந்த நாள் என்று பல நாட்கள் இருக்கிறதோ அதுபோல மனிதனுடைய வாழ்க்கையிலே இவ்வுலகத்தில் வேதனையின் நாட்கள், இடுக்கத்தின் நாட்கள், நெருக்கத்தின் நாட்கள் என்று இருக்கிறது. இந்த நாட்களில் நாம் ஆயத்தமடைய வேண்டும். இது கிருபையின் காலம். நம்முடைய வாழ்க்கையில் உலகத்தின் காரியங்களில் நாம் இழிவாக, அற்பமாக எண்ணப்பட்டு கொண்டிருக்கலாம். நாம் துன்பத்திலும், துயரத்திலும் வாழ்ந்து கொண்டிருக்கலாம். ஆனால் தேவன் நம்மை இப்படியே விட்டுவிடுவது கிடையாது. நம்மைப் படைத்து உருவாக்கின தேவன், தாயின் கர்ப்பத்தில் தெரிந்து கொண்ட தேவன் உங்களை வெறுமையாகவும், உபத்திரவத்திற்குள் ளாகவும் விடுகிற தேவன் அல்ல. “என் ஜனத்தின் உபத்திரவத்தை நான் பார்க்கவே பார்த்தேன்" என்று யாத்திராகம் புத்தகத்தில் சொல்லப்பட்டிருக்கிறதைப் பார்க்கிறோம். இவ்விதமாக அனுதினமும் நம்மைக் காண்கிற தேவன், நம் உள்ளத்தின் வேதனைகளை அறிந்த தேவன், நமக்கென்று அநேக காரியங்களை ஆயத்தப்படுத்தியிருக்கிறார்.
1. சத்துருக்களுக்கு முன்பாக பந்தியை ஆயத்தப்படுத்துகிறார்:
"என் சத்துருக்களுக்கு முன்பாக நீர் எனக்கு ஒரு பந்தியை ஆயத்தப்படுத்தி, என் தலையை எண்ணெயால் அபிஷேகம் பண்ணுகிறீர்; என் பாத்திரம் நிரம்பி வழிகிறது." சங்கீதம் 23:5
தேவன் நமக்கு ஒரு வாக்குத்தத்தம் செய்திருக்கிறார். நீ உன் வாழ்க்கையில் ஒன்றுமில்லாமற்போக வேண்டும் என்று நினைக்கிற உன் சத்துருக்களுக்கு முன்பாக அவர் உனக்காக ஒரு பெரிய பந்தியை ஆயத்தப்படுத்தியிருக்கிறார். அந்தப் பந்தியிலிருக்கிற ஆகாரத்தைக் குறித்து ஏசாயா 25:6ல் “சேனைகளின் கர்த்தர் இந்த மலையிலே சகல ஜனங்களுக்கும் ஒரு விருந்தை ஆயத்தப் படுத்துவார்; அது கொழுமையான பதார்த்தங்களும், பழமையான திராட்சரசமும், ஊனும் நிணமுமுள்ள பதார்த்தங்களும், தெளிந்த பழமையான திராட்சரசமும் நிறைந்த விருந்தாயிருக்கும்" என்று சொல்லியிருக்கிறதைப் பார்க்கிறோம். நம்முடைய தேவன் இந்த பந்தியில் நம் இருதயம் விரும்புகிற வண்ணமாக நேர்த்தியான ஆகாரத்தை வைக்கிறதைப் பார்க்கிறோம். அநேக நேரத்தில் தேவன் நமக்கு கொழுமையான ஆகாரத்தைத் தருகிறார். இப்படியாக தேவன் நமக்கு ஒரு பந்தியை ஆயத்தப்படுத்துகிறார்.
உங்களுடைய வாழ்க்கையிலே அற்பமாயெண்ணப்பட்ட நாட்களை மாற்றும்படி, நீங்கள் துன்பப்பட்ட நாட்களுக்குச் சரியான, மகிழ்ச்சியான நாட்களைக் காணும்படி இப்படியாக ஒரு பந்தியை ஆயத்தப்படுத்தி உங்களை மேன்மைப்படுத்துகிற தேவனாக இருக்கிறார். ஒரு சமயத்தில் நமக்கு ஏதாவது ஒரு உயர்வு கிடைத்தால் நம் உறவினர்கள், நண்பர்களை அழைத்து விருந்து செய்கிறோம். இது உலகப்பிரகாரமானது. ஆனால் கர்த்தருடைய பிள்ளைகளாகிய நமக்கோ அவர் சத்துருக்களுக்கு முன்பாக பந்தியை ஆயத்தப்படுத்துகிறார்.
2.நியாயத்தீர்ப்பின் நாளை ஆயத்தப்படுத்துகிறார்:
"கர்த்தரோ என்றென்றைக்கும் இருப்பார்; தம்முடைய சிங்காசனத்தை நியாயத்தீர்ப்புக்கு ஆயத்தம் பண்ணினார்." சங்கீதம் 9:7
அவர் நம்மை நியாயத்தீர்ப்புக்கு ஆயத்தப்படுத்துகிறார். இந்த நியாயத்தீர்ப்பு என்றாலே சிலருக்கு ஒரு மாதிரி பயம். குற்றமுள்ள மனம் குறுகுறுக்கும். நியாயத்தீர்ப்பு என்றால் நம்முடைய வாழ்க்கையில் செய்த நன்மைக்குப் பலனாக ஆசீர்வாதங்கள் உண்டு. நீங்கள் கெட்டது செய்திருப்பீர்கள் அல்லது தவறு செய்திருப்பீர்கள் என்றால் அதன் முடிவு தண்டனை. இந்த நியாயத்தீர்ப்பின் நாளிலே அவர் நம்மை நீதியாக நியாயந்தீர்ப்பார். உலகப்பிரகாரமான ஒரு தீர்ப்பு அல்ல. உலகப் பிரகாரமாக பணம் இருந்தால் இந்த உலகத்தில் நீதியையே புரட்டி விடலாம். நீதிபதியின் உள்ளத்தையே மாற்றி விடலாம். ஆனால் "ஒவ்வொரு கிரியையும், அந்தரங்கமான ஒவ்வொரு காரியத்தையும், நன்மையானாலும், தீமையானாலும், தேவன் நியாயத்திலே கொண்டுவருவார்" என்று பிரசங்கி 12:14ல் பார்க்கிறோம். மறைமுகமான பாவம், நாம் மறந்து போன பாவங்களை எல்லாம் பாம் தேவன் இந்த நாளிலே இந்த வருடத்திலே இதைச் செய்தாய் என்று சொல்லி அந்தநாளிலே நம்மை நியாயந்தீர்ப்பார்.
நான் திருக்கோவில் என்ற இடத்திற்குச் சென்ற போது ஒரு வாலிப சகோதரிக்காக ஜெபித்தேன். அந்தச் சகோதரிக்கு தான் ஒரு பெரிய பாடகியாக வர வேண்டும், சினிமாவில் நடிக்கவேண்டும், நடனம் ஆட வேண்டும், மற்ற மக்களைத் தன் பக்கமாக கவர்ந்திழுக்க வேண்டும் என்ற எண்ணம் இருந்தது. அந்த மகளின் எண்ணத்தை தேவன் எனக்கு வெளிப்படுத்தினவுடன் நான் அந்த மகளுக்குச் சொன்ன போது, அவளுக்கு ஒரே அழுகையாக வந்தது. தேவனுடைய பார்வையிலே எல்லாம் வெளியரங்கமாயிருக்கிறது. ஆகவே நீங்கள் எதைச் செய்கிறீர்களோ அதற்கு தேவனிடத்தில் நியாயத்தீர்ப்பு உண்டு அருமையான ஜனமே, நம்முடைய வாழ்க்கையிலே நாம் சொல்கிற வார்த்தைகளுக்கு நியாயத்தீர்ப்பு உண்டு. நாம் செய்கிற செய்கைகளுக்கு நியாயத்தீர்ப்பு உண்டு. நீ நல்லது செய்தால் தேவன் உன்னைக் கனப்படுத்துவார். நீ தீமையான காரியங்களைச் செய்திருப்பாயானால் அழுகையும், பற்கடிப்புமான ஒரு வேதனையின் காலத்தை நியாயத்தீர்ப்பாக தருவார் என்பதை மறந்து போகாதே. நீங்கள் விதைக்கிற, நீங்கள் பார்க்கிற, நீங்கள் செய்கிற ஒவ்வொரு காரியத்திற்கும் ஒரு தீர்ப்பை ஆயத்தப் படுத்தியிருக்கிறார். ஆகவே நீங்கள் நன்மை செய்வீர்களானால் அதற்குரிய சந்தோஷமும், அதற்குரிய ஆசீர்வாதமும், அதற்குரிய நன்மைகளும் உண்டு. இம்மையிலும் ஒரு தீர்ப்பு உண்டு. மறுமையிலும் ஒரு தீர்ப்பு உண்டு. இம்மையில் உங்களுடைய செய்கைகளுக்குத் தகுந்த ந நன்மையான ஆசீர்வாதங்களை நீங்களும், உங்கள் சந்ததியாரும் பெற்று கொள்வீர்கள். தீமையான காரியங்களைச் செய்யும் போதும் அதற்குரிய தீர்ப்பு உண்டு. அருமையான சகோதரனே/சகோதரியே, நீ உன்னைக் காத்துக் கொள், பாவக் காரியங்களையும், மறைவான காரியங்களையும், தீமையான காரியங்களையும் நீ செய்துவிட்டு என்னைக் காண்கிறவன் யார் என்று சொல்லி நீ மறைந்து வாழ்கிறாயா ? உன் அந்தரங்கமான காரியத்தை தேவன் நியாயத்திலே நிறுத்துவார். உன்னுடைய ஒவ்வொரு பாவத்தையும் நியாயத்திலே நிறுத்துகிற தேவன். ஆகவே நியாயத்தீர்ப்பை நமக்கு ஆயத்தப்படுத்தியிருக்கிறார்.
3. அவர் நமக்கென்று ஒரு பெரிய ராவ்ஜியத்தை ஆயத்தப்படுத்துகிறார்:
'"அப்பொழுது, ராஜா தமது வலது பக்கத்தில் நிற்பவர்களைப் பார்த்து: வாருங்கள் என் பிதாவினால் ஆசீர்வதிக்கப்பட்டவர்களே, உலகம் உண்டானது முதல் உங்களுக்காக ஆயத்தம் பண்ணப்பட்டிருக்கிற ராஜ்யத்தைச் சுதந்தரித்துக் கொள்ளுங்கள்.' மத்தேயு 25:34
நமக்கென்று தேவன் ஒரு ராஜ்ஜியத்தை ஆயத்தப்படுத்து கிறார் என்று இங்கு பார்க்கிறோம். நீங்கள் யாரைச் சேர்ந்தவர்கள்? தேவனுடைய ராஜ்யத்தை சேர்ந்தவர்கள். ஆகையினால் தேவனுடைய ராஜ்யத்தின் புத்திரர் என்று வேதம் சொல்கிறது. ஆகவே நீங்கள் உங்களுடைய வாழ்க்கையில் ஒரு நாளிலே தேவனுடைய ராஜ்யத்தின் புத்திரராக எழும்பி பிரகாசிப்பீர்கள். ராஜ்யத்தில் நீங்கள் மகிழ்ச்சியாக வாழ இருக்கிறீர்கள். அந்த ராஜ்யத்தை அவர் நமக்கு ஆயத்தப்படுத்தியிருக்கிறார். இந்த உலகப் பிரகாரமான ராஜ்யம் அல்ல. அது அழிந்துவிடும். இந்த உலகத்தில் அநேக ராஜாக்கள் எழும்பினார்கள். ஆனால் அதெல்லாம் ஒரு கதையாக மாறினது. ஆனால் கர்த்தருடைய ராஜ்யமோ நித்தியமானது, நிலையானது. இந்த நிலையான ராஜ்யத்தை தேவன் நமக்கு உண்டு பண்ணியிருக்கிறார். அது மாத்திரமல்ல, நமக்கு இன்னொரு ராஜ்யத்தையும் அவர் ஆயத்தப்படுத்த இருக்கிறார். "என் பிதாவின் வீட்டில் அநேக வாசஸ்தலங்கள் உண்டு; அப்படியில்லாதிருந்தால், நான் உங்களுக்குச் சொல்லியிருப்பேன்; ஒரு ஸ்தலத்தை உங்களுக்காக ஆயத்தம் பண்ணப்போகிறேன்" என்று யோவான் 14:2ல் பார்க்கிறோம். இயேசு கிறிஸ்து மரித்து உயிர்த்தெழுந்து எடுத்துக் கொள்ளப்பட்ட பின்பு உங்களுக்காக, எனக்காக ஒரு ஸ்தலத்தை ஆயத்தம் பண்ணப் போகிறார். மனிதன் தங்கி இளைப்பாறுவதற்கு அவர் ஒரு இடத்தை ஆயத்தப் படுத்தியிருக்கிறார்.
பணக்காரர்கள் எல்லாம் ஒரு வீட்டிற்கு பல வீடுகள் வைத்திருக்கிறார்கள். இந்த நிலையில்லாத உலக வாழ்க்கையில் மனிதர்களிடம் சண்டை போட்டு, சச்சரவுகள் செய்து, கோர்ட்டுக்கு அலைந்து, அலைந்து, தங்களுடைய பணத்தையும் கொடுத்து, வேதனையையும் பெற்று கடைசியில் ஜீவனையும் இழந்து விடுவார்கள். ஆனால் நம்முடைய தேவன் நமக்காக தம் ஜீவனைக் கொடுத்து நமக்கு ஒரு வாசஸ்தலத்தை ஆயத்தப்படுத்துகிறார். உலகப்பிரகாரமான வீடு கிடைத்தால் மிகவும் சந்தோஷப்படுவார்கள். அநேகர் வீடு இல்லையே என்று கவலைப்படுவார்கள். இந்த வீடு அழியக்கூடியது. ஆனால் நிலைவரமான ஒரு வீட்டைக் கர்த்தர் நமக்கு ஆயத்தப்படுத்தியிருக்கிறார்.
தேவன் நமக்குச் சில காரியங்களை ஆயத்தப்படுத்துகிறார். இவை எல்லாம் ஆயத்தப்படுத்துவது நமக்கு நன்மையும், ஆசீர்வாதமும் தான். ஆனால் நாம் ஆயத்தப்படுத்த வேண்டிய சில காரியங்கள் உண்டு.
பாதரட்சை என்னும் ஆயத்தம்:
"சமாதானத்தின் சுவிசேஷத்திற்குரிய ஆயத்தம் என்னும் பாதரட்சையைக் கால்களிலே தொடுத்தவர்களாயும்' எபேசியர் 6:15
குதிரை யுத்தத்திற்கு ஆயத்தப்படும். யுத்தநாளுக்கு ஆயத்தப்படும். ஜெயமோ கர்த்தரால் வரும். இந்த உலகத்தில் நமக்கு ஒரு பெரிய எதிராளி இருக்கிறான். அவனோடு யுத்தம் பண்ண நாம் ஆயத்தப்பட வேண்டும். ஆயத்தம் என்னும் பாதரட்சையை தொடுத்தவர்களாய் இருக்க வேண்டும். முதலாவது ஆயத்தம் பாதரட்சை. நாம் வீட்டை விட்டு வெளியே போகும் போது ஷூ போடுகிறோம். இந்த ஷூவைப் போட்டுக் கொண்டே எல்லா இடத்திற்கும் செல்வது கிடையாது. ஒவ்வொரு இடத்திற்கும் தகுந்தவாறு ஒரு பாதரட்சையை வைத்திருக்கிறோம். குளியலறையில் போடுவதற்கும், வீட்டிற்குள் போடுவதற்கும், விளையாட்டிற்கு போடுவதற்கும் பல பாதரட்சைகளை வைத்திருக்கிறோம். ஆனால் தேவன் ஒரு பாதரட்சையை நமக்கு ஆயத்தப்படுத்த ஆவலுள்ளவராயிருக்கிறார். அது என்னவென்றால் சுவிசேஷம் என்னும் பாதரட்சை.
சுவிசேஷத்தினுடைய பாதரட்சை என்று சொன்னால் பிரித்தெடுக்கப்பட்ட அனுபவத்திற்குரிய ஒரு ஆயத்தம். இதைப் போலத்தான் இந்த உலகத்தில் வாழும் போது இந்த உலகத்தின் கறையானது உங்களில் படாதபடி நீங்கள் பிரித்தெடுக்கப்பட்டவர்களாய் மாறுவதற்கு ஆயத்தப்பட வேண்டும். இந்த பூமியானது தீட்டானது. பாவம் நிறைந்தது. ஆகவே இந்தப் பூமியில் நாம் பாதரட்சையைத் தொடுத்து கொள்கிறோம்.இன்றைக்கு அநேகருடைய வாழ்க்கையிலே இந்தப் பாதாட்சையாகிய ஆயத்தம் இல்லாதபடியினாலே அவர்கள் மீண்டும் மீண்டுமாக இந்த உலகத்தினால் கறைபட்டவர்களாய் மாறி விடுகிறார்கள். தங்கள் வஸ்திரங்களை இயேசு கிறிஸ்துவின் இரத்தத்தினாலே தூய்மைப் படுத்தி கறைபடாதபடி காத்துக் கொள்ளுகிற வாழ்க்கை வேண்டும். ஆகவேதான் யூதாவின் புத்தகத்திலே நம்மை கறைதிரை அற்றவர்களாய், மாசற்றவர்களாய், தேவனுடைய சமுகத்திலே வழுவாதபடி நம்மை நிறுத்துபவர் என்று கர்த்தரைப் பற்றி சொல்வதைப் பார்க்கிறோம். ஆகவே இந்த பிரித்தெடுக்கப்பட்ட அனுபவம் தான் பாதரட்சை.
இந்தப் பாதாட்சையைப் பெற முதலாவது நாம் மனம்திரும்ப வேண்டும். "அப்பொழுது தகப்பன் தன் ஊழியக்காரரை நோக்கி: நீங்கள் உயர்ந்த வஸ்திரத்தைக் கொண்டுவந்து, இவனுக்கு உடுத்தி, இவன் கைக்கு மோதிரத்தையும், கால்களுக்குப் பாதரட்சைகளையும் போடுங்கள்" என்று சொல்லுவதை லூக்கா 15:22ல் பார்க்கிறோம். நாம் நம்முடைய பாவ பாவங்களை உணர்ந்து, பாவ பழக்கத்தை விட்டு விலகி, தகப்பனே உமக்கு விரோதமாகவும், பரத்துக்கு விரோதமாகவும் பாவம் செய்தேன் என்று சொல்லி, மனஸ்தாபப்பட்டு, நம்முடைய பாவத்தை உணர்ந்து, தேவ சமுகத்திலே அறிக்கை செய்யும்போது, நம்முடைய உள்ளமானது தேவனிடத்தில் திரும்பி சுத்திகரிப்பை பெறும்போது, நம்முடைய வாழ்க்கையிலே அந்தப் பாதரட்சையைத் தரித்துக் கொள்வோம். ஆகவே நீங்கள் இந்தப் பாதரட்சையைத் தொடுத்தவர்களாய் காணப்பட வேண்டும். உங்கள் பாவத்திலிருந்து விடுவிக்கப்பட்டவர்களாய், மீட்கப்பட்டவர்களாய் மாற வேண்டும்.
நாம் எவைகளுக்காக ஆயத்தம் செய்ய வேண்டும்:
1. சத்துருவை வெல்ல ஆயத்தம்:
"ஏனெனில், மாம்சத்தோடும் இரத்தத்தோடுமல்ல, துரைத்தனங்களோடும், அதிகாரங்களோடும், இப்பிரபஞ்சத்தின் அந்தகார லோகாதிபதிகளோடும், வாளமண்டலங்களிலுள்ள பொல்லாத ஆவிகளின் சேனைகளோடும் நமக்குப் போராட்டம் உண்டு.'' எபேசியர் 6:12
இந்தப் பாதரட்சையின் ஆயத்தம் எதற்கு என்றால், இந்த உலக வாழ்க்கையில் நீங்கள் பிரித்தெடுக்கப்பட்டதின் நோக்கம் என்னவென்றால், இந்த உலக வாழ்க்கையின் போராட்டட்திலே நீங்கள் வெற்றி பெற வேண்டும் என்பதே. இந்த உலகத்தில் உங்களுக்குப் போராட்டம் உண்டு. இன்றைக்கு அநேகர் நான் கிறிஸ்தவன் ஆகிவிட்டேன், இயேசு கிறிஸ்துவை ஏற்றுக் கொண்டேன். இனி ஒரு உயர்வான சமாதானமான வாழ்க்கை இருக்கும். எனக்கு ஒரு பிரச்சினையும் கிடையாது என்று நினைக்கிறார்கள். ஒருபோதும் அப்படி நினைக்காதீர்கள். என்றைக்கு இயேசு கிறிஸ்துவை ஏற்றுக் கொண்டீர்களோ அன்றைக்குத்தான் பிசாசு உங்களோடு போராட ஆரம்பிப்பான். என்றைக்கு இயேசு கிறிஸ்துவின் பக்கமாக வருகிறீர்களோ அன்றுதான் அவனுக்கு எதிராளியாகிறீர்கள். அன்றையிலிருந்து உங்களுக்கு வாழ்க்கையில் போராட்டம். அதுவரைக்கும் அவன் உங்களுக்கு நண்பன். ஆகவே இந்தப் போராட்டத்திலே நீங்கள் வெற்றி பெறுவதற்கு ஆயத்தப்பட வேண்டும். இராணுவத்தில் போருக்குப் போகும் முன்பு நன்கு ஆயத்தப்படுத்துவார்கள். அங்கு 5 மணிக்கே எழும்ப வேண்டும். ஆனால் வீட்டிலே 8,9 மணிக்கு Bed Coffee கொண்டு வந்து அம்மா எழுப்பினாலும் எழுந்திருக்கமாட்டார்கள். ஆனால் இராணுவத்தில் 5 மணிக்கு எழவில்லை என்றால் இரண்டு சுற்று கூடுதலாக ஒட விடுவார்கள். ஆகவே 5 மணிக்கு என்ன ? 4 மணிக்கே எழுந்து ஆயத்தமாகிவிடுவார்கள். இந்த ஆயத்தம் மிக கஷ்டமாக இருக்கும். இதைப் போலவே தேவன் நம்மை யுத்தத்திற்கு ஆயத்தப் படுத்துகிறார். இந்த உலகத்தில் நாம் வெற்றி பெறுவதற்கு இந்த ஆயத்தம் தேவை.
2.நற்கிரியைகளைச் செய்ய ஆயத்தம்:
''ஆகையால் ஒருவன் இவைகளை விட்டு, தன்னைச் சுத்திகரித்துக் கொண்டால், அவன் பரிசுத்தமாக்கப்பட்டதும், எஜமானுக்கு உபயோகமானதும், எந்த நற்கிரியைக்கும் ஆயத்தமாக்கப்பட்டதுமான கனத்துக்குரிய பாத்திரமாயிருப்பான்.'' 2 தீமோத்தேயு 2:21
இங்கு நற்கிரியைகளைக் குறித்துள்ள ஆயத்தத்தை பார்க்கிறோம். ஒரு எஜமானுடைய வீட்டிலே கனத்திற்குரிய பாத்திரமும்,கனவீனத்திற்குரிய பாத்திரமும் உண்டு. அந்த எஜமானுடைய வீட்டிலே மண் பாத்திரம், மரத்திலான பாத்திரம், சில்வர் பாத்திரம் என்று இருக்கிறது. ஆனால் நாம் மண்ணினால் உண்டாக்கப்பட்டிருக்கிறோம். இந்த மண் எப்படி பாத்திரமாக வனையப்படும்போது கனத்திற்குரியதாக மாறுகிறதோ அதுபோல மண்ணான நாமும் கர்த்தரால் சுத்திகரிக்கப்பட்டு வனையப்படும் போது கனத்திற்குரிய பாத்திரமாக மாறுகிறோம்.
நீங்கள் கொல்லன் பட்டறையை பார்த்தீர்கள் என்றால் பாறையை உடைப்பதற்கு பயன்படும் உளியை நெருப்பிலே போட்டு, பின்பு அதை நன்றாக அடித்து அதனுடைய முனையை கூர்மையாக்குகிறதைப் பார்க்கலாம். இந்த உளியைப் போல நீங்கள் ஆயத்தப்பட பட வேண்டும். நம் மனச்சாட்சி எல்லாம் மழுங்கிப் போய் விட்டது. பொய் சொல்லி, திருடி, பல பாவகாரியங்களைச் செய்து, செய்து மழுங்கிப் போன உளி மாதிரி இருக்கிறோம். நீங்கள் உங்களைப் பரிசுத்தமாக்கிக் கொண்டு, நற்கிரியைகளுக்கு ஆயத்த மடைந்தவர்களாக இருக்க வேண்டும். இந்த ஆயத்தத்தைத் தேவன் நம்மிடம் எதிர்பார்க்கிறார். இந்த ஆயத்தம் உங்களுக்குத் தேவை. கர்த்தருடைய கரத்திலே அலங்காரமான ஒரு பாத்திரமாக தேவனுடைய ராஜ்யத்திலே நிற்பதற்கு தேவ சமுகத்தில் உன்னை ஆயத்தப்படுத்து.
கர்த்தருடைய ஊழியத்தைச் செய்தால் அது நற்கிரியைகள். நாம் நற்கிரியைகளுக்கு ஆயத்தப்பட வேண்டும். நீங்கள் ஓரிடத்திற்குச் செல்லும்போது சமாதானம் கூறுவதற்கும், சந்தோஷம் கொண்டு வருவதற்கும், விடுதலை கொண்டு வருவதற்கும் நீங்கள் தேவனுடைய கரத்தில் ஆயத்தமாக இருக்க வேண்டும். இந்த நற்கிரியைகளைச் செய்ய நீங்கள் ஆயத்தப்பட வேண்டுமானால் நீங்கள் பரிசுத்தப்பட வேண்டும். இயேசு கிறிஸ்துவின் இரத்தம் நம்மை பரிசுத்தப்படுத்துகிறது. நீங்கள் வேத வசனத்தினாலும், ஜெபத்தினாலும் பரிசுத்தமாக்கப்படுகிறீர்கள். இந்தப் பரிசுத்தப் படுதலுக்குப் பரிசுத்த ஆவி தேவையாக இருக்கிறது. ஆகவே உங்களைப் பரிசுத்தப்படுத்திக் கொள்ளும் போது நற்கிரியைகளுக்கு ஆயத்தப்படுவீர்கள். ஆகவே நம்முடைய கிரியைகளைத் தேவ சமுகத்திலே தேவன் அங்கீகரிக்க வேண்டும் என்று வேதம் சொல்கிறது. "இவ்விதமாய் மனுஷர் உங்கள் நற்கிரியைகளைக் கண்டு, பரலோகத்திலிருக்கிற உங்கள் பிதாவை மகிமைப் படுத்தும்படி, உங்கள் வெளிச்சம் அவர்கள் முன்பாகப் பிரகாசிக்கக்கடவது” மத்தேயு 5:16. இந்த உலகத்திலே நீங்கள் படைக்கப்பட்டதின் நோக்கம், நீங்கள் நற்கிரியைகளைச் செய்ய வேண்டும் என்பதே.
உன்னுடைய வார்த்தைகள், செய்கைகள் குடும்பத்திலே மெய்யான சமாதானத்தையும், சந்தோஷத்தையும் கொடுக்க வேண்டும். “ஏனெனில், நற்கிரியைகளைச் செய்கிறதற்கு நாம் கிறிஸ்து இயேசுவுக்குள் சிருஷ்டிக்கப்பட்டு, தேவனுடைய செய்கை யாயிருக்கிறோம்; அவைகளில் நாம் நடக்கும்படி அவர் முன்னதாக அவைகளை ஆயத்தம்பண்ணியிருக்கிறார்." என்று எபே. 2:10ல் பார்க்கிறோம். நற்கிரியைச் செய்யும்போது தேவனுடைய செய்கையாக இருக்கிறீர்கள். எந்த வீட்டிற்காவது சென்றால் அங்கு நற்கிரியை செய்கிறோமா, அந்த வீட்டாருக்குப் பிரயோஜனமான காரியத்தைச் செய்கிறோமா, அல்லது அந்த வீட்டாருக்குத் தீங்கு செய்யும் காரியங்களுக்கு நாம் காரணமாக இருக்கிறோமா என்று ஆராய்ந்து பார்க்க வேண்டும். நீங்கள் தேவனுடைய சமுகத்திலே நற்கிரியைகளைச் செய்கிறவர்களாக இருக்க வேண்டும்.
நம்முடைய வாழ்க்கையிலே நாம் கர்த்தருக்கென்று நற்கிரியைகளைச் செய்வதற்காக அழைக்கப்பட்டிருக்கிறோம். நீங்கள் செய்ய வேண்டிய காரியங்கள் இன்னதென்று உங்களுக்குத் தெரியும். எது நல்லதோ அதைச் செய்யுங்கள். எது நன்மையானதோ அதைச் செய்யுங்கள். திருமணத்தின்போது நீங்கள் உலகத்திற்குள் புறப்பட்டு போங்கள். நன்மையானவைகளைச் செய்யுங்கள். நன்மை யானவைகளைக் காற்றுக் கொள்ளுங்கள் என்று சொல்வார்கள். ஆனால் சிலர் திருமணமாகி ஒரு குடும்பத்தில் வந்தவுடன் அங்குச் சண்டை போட்டு குடும்பம் பிரிந்துவிடும். நாம் அப்படி இருக்கக் கூடாது. நாம் வந்ததினால் அக்குடும்பத்தில் சமாதானம், சந்தோஷம் வரவேண்டும். ஒரு பெரிய வெற்றி வரவேண்டும். இதற்கு தான் அழைக்கப்பட்டிருக்கிறோம். இவ்வாறு நற்கிரியைகளைச் செய்வதற்கு நாம் நம்மை ஆயத்தப்படுத்துவோம்.
3.கர்த்தருடைய வருகைக்கு ஆயத்தம்:
"நீங்கள் நினையாத நாழிகையிலே மனுஷகுமாரன் வருவார்; ஆதலால், நீங்களும் ஆயத்தமாயிருங்கள்.'' மத்தேயு 24:44
இயேசு கிறிஸ்து ஒரு உவமானத்தை லூக்கா 12ம் அதிகாரத்தில் சொன்னார். ஒரு மனிதன் தன் களஞ்சியங்களை இடித்து,பெரிதாகக் கட்டி, தானியங்களை அதில் சேர்த்து வைப்பேன் என்று சொன்னான். அவனைப் பார்த்து தேவன் "மதிகேடனே, உன் ஆத்துமா உன்னிடத்திலிருந்து இந்த இராத்திரியிலே எடுத்துக் கொள்ளப்படும், அப்பொழுது நீ சேகரித்தவைகள் யாருடையதாகும் என்றார்" என்று லூக்கா 12:20ல் பார்க்கிறோம். இன்று அநேகர் கிறிஸ்துவின் வருகையைப் பற்றி யோசிக்கிறதே கிடையாது. ஒருவர் ஒரு இடத்தில் வேடிக்கையாகச் சொன்னார். இரண்டு அம்மா சண்டை போட்டுக்கொண்டு இருந்தார்கள். உடனே அவர் இயேசு கிறிஸ்து வரப்போகிறார். சண்டை போடாதீர்கள் என்று சொன்னார். அவர்கள் யார் வந்தால் எங்களுக்கு என்ன என்றார்கள். இன்றைக்கு அப்படித்தான் இருக்கிறோம்.
இயேசு கிறிஸ்துவின் வருகையைக் குறித்து நாம் பயம் இல்லாதவர்களாக, நம்முடைய உள்ளமானது பரிசுத்தமில்லாது, ஆயத்தமில்லாது இருக்கிறது. இயேசு கிறிஸ்து நினையாத நேரத்திலே வருவார். திருடனைப் போல வருவார். திருடன் சொல்லிவிட்டு வருவதில்லை திருடன் எந்த நேரத்தில் வருகிறான் என்பதே தெரியாது. திருடன் என்ன திருடிவிட்டு போகிறான் என்பதும் தெரியாது.நம் வீட்டிற்கு யாராவது தெரியாதவர்கள் வருவார்கள், நன்கு பேசுவார்கள், பழகுவார்கள். ஆனால் அவர்கள் போனபிறகு தான் நம்முடைய பொருட்கள் காணாமல் போனது தெரியும். பின்பு தான் அந்தப் பொருட்களைத் தேடுவோம். இப்பொருட்கள் எந்த நேரத்தில் எவ்வண்ணமாக காணாமல் போனது என்பதை அறியாமல் இருந்தோமோ அதைப்போலவே கிறிஸ்துவின் வருகையும் நாம் எதிர்பாராத வேளையில் சம்பவிக்கும்.
பத்து கன்னிகைகளில் மணவாளனுடைய வருகைக்கு என்று ஆயத்தமாக இருந்த ஐந்து பேர் மட்டுமே மணவாளனோடு கல்யாண வீட்டுக்குள் பிரவேசித்தார்கள். ஆயத்தமில்லாதிருந்த மற்ற 5 பேரும் கைவிடப்பட்டார்கள் என்று மத். 25ம் அதிகாரத்தில் வாசிக்கிறோம். எனவே தேவ ஜனமே கர்த்தருடைய வருகை அதிக சமீபத்தில் இருக்கிறதென்று உலகமெங்குமுள்ள பக்தர்கள் நமக்கு கூறுகிற படியினால் நாமும் அவருடைய வருகையில் அவரைச் சந்திக்க பாத்திரராகக் காணப்பட நம்மை ஆயத்தப்படுத்துவோம்.
சத்துருவை மேற்கொள்ளவும், நற்கிரியைகளைச் செய்யவும் நம்மை ஆயத்தப்படுத்துவதோடல்லாமல் நினையாத நேரத்தில் சம்பவிக்கும் நம்முடைய கர்த்தருடைய வருகைக்கென்றும் நம்மை நாம் ஆயத்தப்படுத்துவோம்.
கர்த்தர் நம்மை ஆசீர்வதிப்பாராக.
கிறிஸ்து இயேசுவின் பணியில்,
சகோ. C. எபனேசர் பால்.
(இந்தச் செய்தி 1994 மே மாதத்தில் வெளியிட்டது)
