கிறிஸ்துவுக்குள் பிரியமானவர்களே,
கர்த்தராகிய இயேசு கிறிஸ்துவின் இனிய நாமத்தினால் உங்களை வாழ்த்துகிறேன்.
ஒரு சிறிய நீர்க்காகம் மீன்களைப் பிடித்துச் சாப்பிட்டுக் கொண்டிருந்தது. அது எப்பொழுதும் போல இங்கும் அங்கும் அலைந்து மீன்களைப் பிடித்துக் கொண்டிருந்தது. கடைசியாக Eel இனத்தைச் சேர்ந்த பாம்பு போல் உள்ள அந்த மீனைப் பிடித்து முழுங்க முயற்சி செய்தது. அந்த மீன் அந்த நீர்க்காகத்தின் கழுத்தைச் சுற்றிக் கொண்டது. சிறிது நேரத்தில் அதனால் ஒன்றும் செய்ய முடியாமல் மாண்டுபோனது. அந்த நீர்க்காகம் எத்தனையோ முறை அது போன்ற மீன்களை உணவாக உண்டிருக்கும். ஆனால் இம்முறை அது மாண்டு போனது.
பலருடைய வாழ்க்கையில் பாவ பழக்க வழக்கங்கள் இப்படித் தான் காணப்படுகிறது. இந்தப் பாவத்தை நான் எளிதாக விட்டு விடுவேன், இந்தப் பாவத்தால் எனக்கு எந்தக் கெடுதியும் கிடையாது என்று நினைக்கிறார்கள். முடிவில் அந்தப் பாவத்திற்கு அடிமையாகி அதின் பிடியிலிருந்து விடுபட முடியாமல் சிக்கிக் கொள்ளுகிறார்கள். எனக்குத் தெரிந்த ஒரு சகோதரர் குடிப்பழக்கத்துக்கு அடிமையாகி அதை விடமுடியாமல் அதில் சிக்கிக் கொண்டார். ஆரம்ப நாட்களில் அவர் கூறும் வார்த்தை 'I know my limit'.ஆனால் அவரால் அதை 'limit' டோடு நிறுத்த முடியவில்லை. அந்தப் பாவம் அவரை மேற்கொண்டது.
உங்கள் பாவம் உங்களைத் தொடர்ந்து பிடிக்கும். அது சாதாரண கோபமாக இருக்கலாம். கசப்பாக இருக்கலாம். வேதம் சொல்கிறது கொஞ்ச புளித்த மாவானது, மொத்த மாவையும் உப்பப்பண்ணும். பாவத்தைக் குறித்து நாம் அஜாக்கிரதையாக இராமல், கவனமாய் இருந்து பாவத்திற்கு விலகி ஜீவிக்க வேண்டும்.
இயேசு கிறிஸ்து எல்லாவற்றையும் மாற்றக்கூடிய வல்லமை உள்ளவர். இயேசு கிறிஸ்துவின் இரத்தத்தில் வல்லமை உண்டு. '...இயேசு கிறிஸ்துவின் இரத்தம் சகல பாவங்களையும் நீக்கி, நம்மைச் சுத்திகரிக்கும்.” 1 யோவான் 1:7. நாம் நம்முடைய பாவங்களை அவரிடத்தில் அறிக்கையிட்டால், அவர் நம்முடைய பாவங்களை மன்னித்து, நம்மைச் சுத்திகரித்து பாவத்தின் அடிமைத்தனத்திலிருந்து விடுதலையாக்குவார்.
கர்த்தர் நம்மை ஆசீர்வதிப்பாராக.
